Modista del Corazon

Chapter 19
Isinusuot ni Elo ang singsing na gawa sa straw sa palasingsingan ni Diana. “. . . sa hirap at ginhawa . . .” sabi ni Elo.
Natawa si Diana. “Kung noon hindi na magkasya, ngayon pa kaya?”
Inilipat ni Elo ang singsing sa hinliliit ni Diana. “Kasya na kahit sa dulo lang.”
Ngumiti si Diana. “Tulad noon.”
Niyakap ni Elo si Diana. “Patawarin mo ako.”
“Dahil hindi sakto sa daliri ko ang singsing?”
Iniharap ni Elo si Diana sa kanya. “Dahil nalimutan kong mahal kita.”
Sumeryoso si Diana. “Isayaw mo ako.”
“Ngayon?”
“Ipagpatuloy natin ang naudlot na sayaw nu’ng JS Prom.”
“Pero --”
Tinanggal ni Diana ang karayom ng dextrose sa likod ng kanyang kamay. Napangiwi s’ya sa sakit. Tinakip ni Elo ang isang bahagi ng kumot sa likod ng kamay ni Diana.
“Patunayan mong mahal mo ako. Isayaw mo ako.”
Tinayo ni Elo si Diana. Humindig sa dibdib n’ya si Diana, kumapit sa balikat ang isang kamay at ang isang kamay nama’y dumantay sa likod ni Elo.
“Kumanta ka,” utos ni Diana. “Kantahan mong muli ako.”
Sa saliw ng pag-awit ni Elo ng It Might Be You nagkaroon ng katuparan ang naunsiyaming first dance nila.
Hindi pa man nangangalahati sa pagkanta si Elo, biglang nahulog na si Diana sa sahig. Tarantang inakay ni Elo si Diana pabalik sa kama.
“Pagod na ako,” sabi ni Diana.
“Matulog ka na ulit, para mapagmasdan kita.”
Pumikit si Diana. Ngumiti. “Salamat.”
Hinagkan ni Elo ang kamay ni Diana.
“Pareho ba sa sayaw n’yo ni Trina?”
“Diana --”
“Magkaiba, hindi ba?”
Hinagkan ni Elo sa pisngi si Diana. “Magkaiba, dahil ikaw ang mahal ko.”
Huminga ng malalim si Diana. “Makakatulog ako ng mahimbing.”
Hinawakan ni Elo ang kamay ni Diana. Pinagmasdan n’ya ito. “Sorry,” bulong n’ya. Sinimulan n’yang lagyan muli ng dextrose si Diana.
“Halikan mo ako,” sabi ni Diana, “sa labi.”